Da richtige Umgang

I wach' auf in da Früah,
g'worfa in a Welt,
wo 's überall und himmelweit fehlt
an wahrhaftiger Wärm', am Versteh'woll'n, am G'fui,
wo a Saukält'n duat herrsch'n,
wo nur G'walt is im Spui,
wo a aufrechte Liab, wia 's scheint, is vergess'n,
wo bloß Ehrgeiz zum Zui führt, beim Ellabog'nwettstess'n …

… beim Kampeln im Spiagl schaugt ma dann oana in d'Aug'n,
der ausschaugt, als dat eam scho gar nix mehr taug'n.
--- Da frag' i mi zwangsläufig bei dem vis-à-vis:
„Bin i no da richtige Umgang für mi?“

(Oder sollt' i mi, zwengs meiner, gar selber umgeh'?
Mei --- freilich --- der Tag, der werat dann schee!)