Ge-dicht

Oana kimmt
und nimmt
a Gedicht in d'Hand,
duat 's les'n …

I frag' g'spannt:
„Na, wia is 's g'wes'n?“
„Z' kurz!“, sagt er,
„'s war glei g'les'n.
Du müassast vui mehra, vui länger schreib'n,
woasst scho,
dann hätt' ma mehra davo'!“

I versuach 's z'erklär'n:
„Schau“, sag i, „dafür is 's ja a Gedicht,
dass 's ois bloß ospricht …
Schau, --- des kimmt ma so vor,
exakt
wia beim Kaffee-Extrakt:
Auflös'n muass ma 's alloa … !“

Da ander' red't oiwe weiter
dageg'n,
werd oiwe g'scheiter …

Da dua i ned lang überleg'n
und sag:
„A Gedicht muass 'dicht' sei,
drum hoasst's 'Ge-dicht'.
So, und jetzt hör' auf mit deim Streit,
denn wenn 's anders war,
hoassat 's 'Ge-breit'!“